Fri. Nov 22nd, 2019

የሸገርን ማስዋብ ፕሮጀክት አካል ግንባታ በይፋ ተጀመረ

በቻይና መንግስት ድጋፍ ግንባታው የሚካሄደው የሸገር ማስዋብ ፕሮጀክት አካል ግንባታ ስራ በይፋ መጀመሩ ተገለጸ፡፡

የፕሮጀክቱ አካል የሆነው ሸራተን ሆቴል ፊት ለፊት ያለው 42 ስኩዌር ኪሎ ሜትር መሬት እንደሚለማም ነው የተገለፀው።


አሰራሩም ግዙፍ ክፍት መዝናኛ እና አደባባይ የኢትዮጵያን ህብረ ብሄራዊነት በሚገልፅ መልኩ እንደሚሆን ነው የተነገረው።

በግዙፉ ፓርክ ሰው ሰራሽ ሃይቅ፣ የሰርግ ስነ ስርዓት መከወኛ ስፍራ፣ የሙዚቃ እና የተለያዩ ትርኢቶች መከወኛ ቦታ እንደተካተተ ነው የተነገረው።

የህፃናት መጫወቻ፣ የሳይንስ እና ቴክኖሌጂ ማእከልም በፕሮጀክቱ ሁለተኛው ምእራፍ ይገነባሉ ተብሏል።

የፕሮጀክቱ የመጀመሪያ ምእራፍ ግንባታ በመጪው ግንቦት ወር እንደሚጠናቀቅ የተገለፀ ሲሆን፥ ፕሮጀክቱ የከተማዋን የውበት እና ተፈላጊነትን ይጨምራል ተብሎ ታምኖበታል።

በፕሮጀክቱ ማስጀመሪያ ስነ ስርዓት ላይም የኢፌዴሪ ጠቅላይ ሚኒስትር ዶክተር አቢይ አህመድ እና የአዲስ አበባ ከተማ ምክትል ከንቲባ ኢንጂነር ታከለ ኡማን ጨምሮ ሌሎች ከፍተኛ የስራ ሀላፊዎች እና የቻይና መንግስት ተወካዮች ተገኝተዋል።

ጠቅላይ ሚኒስትሩ በሽገርን ማስዋብ ፕሮጀክት ማስጀመሪያ ስነ ስርአት ላይ ባደረጉት ንግግር፥ የኢትዮጵያን የብልፅግና ጉዞ ምንም አይነት ሃይል ሊያስቆመው አይችልም ብለዋል።

የኢትዮጵያ ህልውና እና ብልፅግና በህዝቦቿ ትጋት የቆመ ነው ሲሉም ነው የተናገሩት።

ጠቅላይ ሚኒስትር ዶክተር አብይ አክለውም፥ በቻይና መንግስት ድጋፍ የሚገነባው ፕሮጀክት አዲስ አበባን እንደስሟ አበባ የማድረግ አካል ነው ብለዋል።

ጠቅላይ ሚንስትሩ በፕሮጀክቱ ማስጀመሪያ ላይ ባደረጉት ንግግር ከቦሌ እስከ ቤተ መንግስት ያለውን መስመር የማስዋብ ስራ በቅርብ ይጀመራል ብለዋል።

በእንጦጦ ተራራ እስከ 100 ሺህ ሰው የሚያስተናግድ የመሮጫ እና የእግር ጉዞ መከወኛ ስፍራ እንደሚገነባም አስታውቀዋል።

በፕሮጀክቱ ከእንጦጦ ተራራ እስከ ባምቢስ ድልድይ ያለው 12 ኪሎ ሜትር ወንዝ እና የወንዝ ዳርቻዎች የሚለማ መሆኑ ታውቋል።

%d bloggers like this: