Sat. Oct 24th, 2020

“ኤጀንሲው ሕግን መሰረት ሳያደርግ ለፈጸመው ስህተት ይቅርታ ይጠይቀን” –ዶ/ር ማርቆስ ፈለቀ– የኤቢኤች ዋና ሥራ አስፈጻሚ

ከሶስት ቀናት በፊት “የመንግስት ዩኒቨርሲቲዎች ከግል ኮሌጆች ጋር በትብብር እንዲሰሩ  የሚፈቅድ አሰራር አለመኖሩን ተከትሎ” በትብብር እንዳይሰሩ የከፍተኛ ትምህርት አግባብነትና ጥራት ኤጀንሲ  ማገዱን እንዳስታወቀ ይፋ አደረገበት በተባለው የማህበራዊ ድረ-ገጽ ላስተላለፈው መልዕክት “ይቅርታ ይጠይቅ” ተባለ፡፡

የጅማ ዩኒቨርሲቲ ከኤቢኤች ፓርትነርስ ጋር፣ ደብረ ማርቆስ ዩኒቨርሲቲ ከዮም ኮሌጅ ጋር፣ ባህርዳር ዩኒቨርሲቲ ከናሽናል ኮሌጅና ሐሮማያ ዩኒቨርሲቲ ከአዲስ ኮንቲኔንታል የጤና ኢንስቲትዩት በትብብር ማስተማራቸውን እንዲያቆሙ እግድ እንደተጣለባቸው በአንዳንድ ሚዲያዎችም ላይ ተዘግቧል፡፡


ይህ በእንዲህ እንዳለ፣ ሰኞ፣ ነሐሴ 13/2011 ዓ.ም. ቦሌ በሚገኘው የጅማ የኒቨርሲቲ የአዲስ አበባ ካምፓስ በተሰጠ ጋዜጣዊ መግለጫ ላይ የኤቢኤች ፓርትነርስ ዋና ሥራ አስፈጻሚ የሆኑት ዶ/ር ማርቆስ ፈለቀ እንደተናገሩት “እኛ ሕግን ተከትለን እየሰራን ነው፤ ኤጀንሲውም በአዋጅ የተሰጠንን ስልጣን በፌስቡክ አይሽርም፤“ ብለዋል፡፡ “በመገናኛ ብዙሃን የተገለፀው ጉዳይም፣ የጅማ ዩኒቨርሲቲን ስም የሚያጎድፍና የተሳሳተ እንደሆነም” ዋና ሥራ አስፈጻሚው ይፋ አድርገዋል፡፡

የጅማ ዩኒቨርሲቲን እንደገና ለማቋቋም በወጣው የሚኒስትሮች ምክር ቤት ደንብ አዋጅ 240/2003 አንቀጽ ሶስትን ጠቅሰው የተናገሩት ዶ/ር ማርቆስ፣ “የዩኒቨርሲቲው ዋና ግቢ ጅማ ሆኖ በሌሎች ቦታዎች ላይ የትምህርት ክፍሎችና የምርምርና የሕብረተሰብ አገልግሎት ሊያቋቁም እንደሚችል” አብራርተዋል፡፡

የከፍተኛ ትምህርት ተቋማት አዋጅ ቁጥር 650/2001 ዓ.ም አንቀጽ 89 ላይ ከተጠቀሱት የከፍተኛ ትምህርት አግባብነትና ጥራት ኤጀንሲ ተግባራትም ላይ ኤጀንሲው የእውቅና ፈቃድ እና እድሳት ግምገማን ማካሄድ እንጂ  የማገድ ስልጣን እንደሌለው እንደሚደነግግ” ያስረዱት ዋና ሥራ አስፈጻሚው፤ “እግዱ ሕጋዊ ስላልሆነና ተገቢነትም ስለሌለው፤ ኤጀንሲው ኤቢኤችንና ጅማ ዩኒቨርሲቲን ይቅርታ  ካልጠየቀና ድርጊቱን የፈጸሙትን አጣርቶ ቅጣት ካላልስተላለፈ ጉዳዩን በህግ አግባብ፣ በፍርድ ቤት በመታተል መብታችንን እንጠይቃለን፤” ብለዋል፡፡

ጅማ ዩኒቨርሲቲ ከኤቢኤች ጋር እንዳይሰራ ለምን ተከለከለ? ተብለው ሲጠየቁም፣ “የግል ኮሌጆች ከመንግስት ዩኒቨርሲቲዎች ጋር የሚሰሩ ተቋማት ከገበያ ሊያስወጡን ነው፤ ብለው ቅሬታ ሲያቀርቡ እንደነበርና ይህም ስጋታቸው አይሎ ኤጀንሲው ላይ ጫና ሊያሳድሩ እንደሚችሉም፤” አስምረውበታል፡፡

ዶ/ር ማርቆስ ኤቢኤች ፓርትነርስ ከጅማ ዩኒቨርሲቲ የምርምርና የማማከር ተግባራትን በጋራ መስራት ሲጀምሩ “በወቅቱ የነበሩት የትምህርት ሚኒስትር ዴኤታ ደስተኛ እንደነበሩና መሰል ትብብሮች ሊቀጥሉ ይገባል ሲሉ አድናቆታቸውን ገልጸው ትምህርት ሚኒስቴርና ሌሎቹም ተቋማት ይሁንታ ሰጥተዋቸው ስራ መጀመራቸውንም” አልሸሸጉም፡፡

የጅማ ዩኒቨርሲቱ የሕዝብ ግንኙነት ዳይሬክተር የሆኑት አቶ መዘምር ሰይፉ በበኩላቸው ጅማ ዩኒቨርሲቲ የትምህርት ጥራቱ ከፍተኛ፣ በአዲስ አበባውም ሆነ በዋናው የጅማ ካምፓሱ ያሉት የመማሪያ ክፍሎች፣ ላቦራቶሪዎችና ሌሎችም አስፈላጊ ነገሮች የተሟሉለት እንደሆነ ገለጻ አድርገዋል፡፡

%d bloggers like this: