Wed. Dec 11th, 2019

አቶ ሚሊዮን ማቲዎስን ወደ ፌዴራል ስልጣን የሸኘው ደቡብ ክልል አርብ አዲስ ርዕሰ መስተዳድር ይሾማል

የደቡብ ክልል ፖለቲካ የተረጋጋ አልሆነም፡፡ አቶ ደሴ ዳልኬን ተክተው ከዓመት በፊት የክልሉን ርዕሰ መስተዳድርነት የተረከቡት አቶ ሚሊዮን ማቲዮስ ወደ ፌዴራል ስልጣን መዘዋወራቸውንና የክልሉን ርዕሰ መስተዳድርነትም አቶ መለስ ዓለሙ ሊረከቡ መሆኑ ተሰምቷል፡፡

ሪፖርተር ጋዜጣ በዛሬ እትሙ ከውስጥ ምንጭ ደረሰኝ ባለው መረጃ እንደገለጸው፤ አቶ ሚሊዮን የኢህአዴግ ምክር ቤት የዴሞክራሲ ማዕከል ምክትል አስተባባሪ ሆነው መሾማቸውን አሳውቋል፡፡ አቶ  ሚሊዮን አዲሱን ሹመት የተቀበሉት በሚኒስትርነት ማዕረግ እንደሆነም ጋዜጣው ጨምሮ አስነብቧል፡፡


የደቡብ ክልል በሲዳማ የክልልነት ጥያቄ ጋር በተያያዘ ሰላም የራቀው ክልል ሆኖ ቆይቷል፡፡ በተለይም ራሱን ኤጄቶ ብሎ የሚጠራው የሲዳማ ክልል እንሁን አቀንቓኝ የወጣቶች ስብስብ፤ በክልሉ ሌሎች ብሔረሰቦች ላይ ከፍተኛ የሚባል ሰቆቃና ጥቃት ሲፈጽም ቆይቷል፡፡ ይህን ጥፋት ሲፈጽምም አቶ ሚሊዮን የሚመሩት የክልሉ መንግስት በዝምታ በማለፉ ለትችት ሲዳረጉ ቆይተዋል፡፡ ከዚህ በተጨማሪም በጉጂ እና በጌዴኦ ነዋሪዎች መካከል በተፈጠረ ግጭት ከሚሊዮን የሚልቁ የጌዴኦ ተወላጆችን ድጋፍና እርዳታ አለማድረጋቸው ብሎም ቦታው ድረስ ሄደው ባለመጠየቃቸውና ችግሩ ተደበስብሶ እንዲያልፍ ጥረት ማድረጋቸው ለከፋ ትችት ተዳርገው ቆይተዋል፡፡

የኢትዮጵያ መንግስት የባጀት መዝጊያው መጠናቀቁን ተከትሎ የ2012 ዓ.ም የመንግስት ባጀት ሲጸድቅ ክልሎችም የየራሳቸውን ባጀት አጽድቀው ወደ ስራ ገብተዋል፡፡ ሆኖም የደቡብ ክልል እስካሁን ድረስ ባለፈው ዓመት ባጀት እንጂ አዲስ ባጀት አማጽደቁ አነጋጋሪ ሆኖ ቆይቷል፡፡ የአቶ ሚሊዮን ማቲዎስ መነሳትም በክልሉ ለሰፈነው ስርዓት አልበኝነት መቆጣጠር ተስኗቸዋል ወይም ድርጊቱን በቸልታ ማለፍን መርጠዋል በሚል ለቀረበባቸው መጠነ ሰፊ ወቀሳ ማስታገሻ ሳይሆን እንደማይቀር ይገመታል፡፡ አቶ ሚሊዮንን ከክልሉ ርዕሰ መስተዳድርነት ያነሳው የደቡብ ክልል ምክር ቤት በምትካቸው የቀድሞውን የማዕድንና ኢነርጂ ሚኒስት አቶ መለስ ዓለሙን እንደሚሾም ይጠበቃል፡፡

%d bloggers like this: