Wed. Dec 11th, 2019

ማጭበርበር የፈጸመችው ግለሰብ በ12 ዓመት ጽኑ እስራት እና በ63 ሚሊዮን ብር ተቀጣች

የቴሌኮም ማጭበርበር ወንጀል የወጣውን አዋጅ ቁጥር 761/2004 አንቀጽ1/ለ ስር የተመለከተውን በመተላለፍ ተከሳሽ አለም ታምራት የቴሌኮም መሳሪያዎችን ወደ ሀገር ውስጥ በማስገባት ፣ለመጠቀም እና የተሌኮም አገልግሎት ለመስጠት የሚያስችል ህጋዊ ፍቃድ ሳይኖራት ስትሰራ ተይዛ በቁጥጥር ስር ውላለች፡፡

ወንጀሉ የተፈጸመው በቦሌ ክፍለ ከተማ ወረዳ 06 ልዩ ስሙ ገርጂ አካባቢ ነው፡፡


ከቀድሞ የመገናኛ እና ኢንፎርሜሽን ቴክኖሎጅ ሚኒስቴር በተሰጠ ፍቃድ ብቻ ወደ ሀገር ውስጥ እና ለመጠቀም የሚቻሉትን የኮል ተርሚኔሽን፣ ኮል ባክ፣ ጥሪ የመቀበል እና ጥሪ የመላክ አገልግሎት መስጠት የሚችሉ ኢትዮ ቴሌኮም ሲም ካርዶችን በውስጣቸው በማስገባት በአንድ ጊዜ ብዛት ያላቸውን እቃዎች በቅናሽ በመግዛት ጥሪዎችን ማስተላለፍ የሚችሉ ብዛታቸው 4 የሆኑ ጌት ዋይ የተባሉ የቴሌኮም መሳሪያዎችን ፣ከኢንተርኔት ኔትወርክ ጋር በማገናኘት የሚያገኙትን ኔትወርክ በማብዛት ወደ ዋየርለስ ኔትወርክ እንዲቀየር በማድረግ የራሳቸውን ኔት ወርክ መፍጠር የሚችሉ 15 ቶፒ ሊንክ የተባሉ መሳሪያዎችን ከሌሎች አጋዥ መሳሪያዎች ጋር በመጠቀም ወንጀለኛ ተብላ ተከሳለች፡፡

በተጨማሪም ከውጭ ሀገር ወደ ሀገር ውስጥ የሚደረጉ የስልክ ጥሪዎችን ኢትዮ-ቴሌኮም በዘረጋው ኔት ወርክ በኩል እንዲያልፉ በማድረግ 6,379,342.19 ብር ከተለያዩ ዓለም ሀገራት ወደ ኢትዮጵያ ጥሪዎችን በማስተላለፍ ኢትዮ ቴሎኮም የዘረጋውን መሰረተ ልማት ወደ ጎን በመተው አለም አቀፍ የቴሌኮም አገልግሎት በመስጠት ወንጀል እንደተከሰሰችም ከፌዴራል ጠቅላይ ፍርድ ቤት የተገኘው መረጃ ያሳያል፡፡

ጉዳዩን የተመለከተው የፌደራል ከፍተኛ ፍርድ ቤት ልደታ ምድብ 14 ወንጀል ችሎትም አቃቤ ህግ ያቀረበውን የሰውና የሰነድ ማስረጃዎችን ተመልክቷል፡፡ ፍርድ ቤቱም በ14/08/2011 ዓ.ም በዋለው ችሎት በ12 ዓመት ጽኑ እስራት እና በ63 ሚሊዮን የገንዘብ መቀጮ እንዲቀጣ ተወስኖባታል፡፡

%d bloggers like this: