Sat. Oct 24th, 2020

ሐዋሳ ከተማ በልዩ ሐይልና በፌዴራል ፖሊስ እየተጠበቀች ነው

ሐሙስ ሐምሌ 11/2011 ዓ.ም፣ ውቢቷ ሐዋሳ ከወትሮው ሞቅ ደመቅ ካለ ድባቧ በተለየ ጸጥ-ረጭ ብላና ከባድ ዝምታ ረቦባት ታየች፡፡

ኤጀቶ በተባሉት የሲዳማ ወጣቶችና የብሄሩ ልሂቃን አማካኝነት ሐምሌ 11/2011 ዓ.ም የሲዳማን ክልልነት በይፋ ለማወጅ በማህበራዊ ድረ-ገጾችና በተለያዩ መንገዶች እንቅስቃሴ ሲደረግ መቆየቱ ይታወሳል፡፡ ይህንን ተከትሎም “ለሰልፍ የወጡና ነዋሪነታቸው በሐዋሳ ከተማ እንዳልሆኑ የተነገረላቸው ወጣቶች ሐምሌ 11 ከጠዋቱ 3፡00 ሰዓት አካባቢ ከተማዋን መረበሻቸውንና ከፌዴራል ፖሊስ እና የክልሉ ልዩ ኃይል የፀጥታ ኃይሎች ጥይት መተኮሱንና ከተማዋም አሁን ላይ ጸጥ-ረጭ ብላ ትገኛለች፡፡ የንግድ ቤቶች ተዘግተዋል፡፡  አንዳንድ አገልግሎቶች ተቋርጠዋል፡፡ ባንኮች ክፍት ቢሆኑም ወደ እነርሱ የሚመጡ ተገልጋዮች እንደሌሉና ህዝቡ በየመኖሪያ ቤቱ ከቶ እንደሚገኝ ምንጮች ለሞላ መልቲ ሚዲያ ተናግረዋል፡፡ ምንጮቻችን የፌዴራል ፖሊስ ወደ ሐዋሳ ከተማ የገባው ከሐምሌ 11 ቀደም ብሎም እንደሆነ” ነግረውናል፡፡


የሲዳማን ክልልነት ለአመታት ሲሹ የቆዩት የብሔረሰቡ አባላት፣ በቅርቡ “ኤጀቶ” ተብለው ብቅ ያሉት የወጣቶች ስብስብ ብሎም ጥቂት የሲዳማ ምሁራን ሐምሌ 11/2011 ዓ.ም ውቢቷ ሐዋሳ ከተማን ያጠቃለለ የሲዳማ ክልልነት ጥያቄን የሚታወጅበት ቀን መሆኑን ክልልነትን አጥብቀው በናፈቁ ኃይሎች መታወጁ ይታወሳል፡፡

ይሁን እንጂ ጉዳዩን በጥናት አካቶ እንደሚያቀርብና በቅርቡ በተጠናቀቀው መደበኛ ስብሰባውም ዋና አጀንዳ እንዳደርገው የተነገረለት የክልሉ ገዢ ድርጅት የደቡብ ኢትዮጵያ ሕዝቦች ዴሞክራሲያዊ ንቅናቄ (ደኢሕዴን)፤ ይህ ዘገባ እስከተጠናቀረበት ጊዜ ድረስ በሲዳማ የክልልነት ጉዳይ ላይ የሰጠው/ያወጣው ይፋዊ  መግለጫ የለም፡፡

ጉዳዩ የሚመለከተው የኢትዮጵያ ብሔራዊ ምርጫ ቦርድ ባወጣው መግለጫ እንዳስታወቀው “ምንም እንኳን የሲዳማ ዞን ምክር ቤት የክልልነት ጥያቄውን ለደቡብ ክልል ያቀረበው ቀደም ብሎ ቢሆንም የማደራጀት ጥያቄውን ለምርጫ ቦርድ ያቀረበው በሕዳር 11/2011ዓ.ም በመሆኑ ቦርዱ ስለጥያቄው እውቅና ኖሮት ዝግጅት የሚጀምረው/የጀመረው ከዚህ ቀን አንስቶ በመሆኑ በተጨማሪም ቦርዱ የሕዝበ-ውሳኔን የማደራጀት ሃላፊነት የወሰደው ከክልሉ ምክር ቤት በውክልና በመሆኑ ውክልናው በይፋ ከተሰጠበት ከሕዳር 11/2011ዓ.ም አንስቶ የቦርዱ ሕገ-መንግስታዊ ገደብ የሚጠናቀቀው ከአምስት ወራት በኋላ እንደሚሆን” ይፋ አድርጓል፡፡

ቦርዱ በመግለጫው እንዳስታወቀው፤ “በሲዳማ የክልልነት ሕዝበ-ውሳኔ ላይ የፖለቲካ አቋም የለኝም፣ አድሎም አላደርግም” ብሏል፡፡

የሲዳማ የክልልነት ጥያቄ ለአመታት የዘለቀ እንደሆነ ይታወቃል፡፡

%d bloggers like this: